Brúðarmær í krísu

Undirbúningur brúðkaups getur verið skrautlegur, en því fær Annie Walker að kynnast þegar hún tekur að sér hlutverk aðalbrúðarmeyjar í brúðkaupi æskuvinkonu sinnar. Með vinsælustu grínleikkonu Bandaríkjanna í fararbroddi, Kristen Wiig, fær myndin Bridesmaids góða dóma gagnrýnenda.

Annie Walker er einhleypur kökubakari sem vinnur fyrir sér í skartgripabúð. Þegar æskuvinkonan Lillian trúlofast og biður Annie að vera aðalbrúðarmær getur hún ekki neitað. Annie fær samt hálfgert taugaáfall þegar hún gerir sér grein fyrir ábyrgðinni sem fylgir hlutverkinu, enda er tímafrekt að skipuleggja gæsapartí, hjálpa til við að velja kjól og vera einstakur stuðningsmaður verðandi brúðar.

Með nokkrum litríkum vinkonum og vandamönnum Lillian hefst Annie handa við skipulagningu samhliða því að takast á við erfiðleika í einkalífinu, en það hrindir af stað fyndinni atburðarás.

Aðalleikkona myndarinnar, Kristen Wiig, hefur verið ein af færustu grínleikkonun vestanhafs, en hún er hluti af Saturday Night Live leikhópnum og lék meðal annars í Flight of the Conchords. Wiig fær mikið lof fyrir leik sinn í myndinni og er kölluð gyðja grínsins í dómi Rolling Stone. Í öðrum helstu hlutverkum eru þær Maya Rudolph, Rose Byrne, Melissa McCarthy, Wendi McLendon-Covey og Ellie Kempe. Leikstjóri Bridesmaids er Paul Feig, sem er með myndir á borð við Knocked Up og sjónvarpsþættina Arrested Development á ferilskránni.

Gagnrýnendur lofa myndina í hástert. Miðlar á borð við Entertainment Weekly og Wall Street Journal gefa henni til að mynda fullt hús stiga, en meðaleinkunnin er 74 stig af 100 mögulegum.alfrun@frettabladid.is