Missir af 17. júní gleðinni í Sofíu

„En leiðinlegt að maður skuli missa af þessu," segir Ásdís Rán Gunnarsdóttir, frægasta dóttir Íslands í höfuðborg Búlgaríu, Sófíu.

Íslandsverkefnið Inspired by Iceland stendur fyrir mikilli þjóðhátíðargleði á offiseraklúbbi í miðborg Sofíu hinn 17. júní næstkomandi. Söngkonan Lára Rúnarsdóttir og plötusnúðurinn President Bongo munu skemmta gestum og gangandi. Hins vegar verður frægasti Íslendingur borgarinnar víðsfjarri.

„Við verðum hér á Íslandi til 16. júní og fljúgum þá til München og keyrum þaðan til Sófíu," segir Ásdís, en hún var að eigin sögn að gæða sér á íslenskum mat á Sólon í miðbæ Reykjavíkur þegar Fréttablaðið náði tali af henni. „Við erum eiginlega heimilislaus þar til Garðar er kominn með nýjan samning þannig að ég ákvað að leigja íbúð í miðbæ Sófíu. Hún er á besta stað með sundlaug og öllu," segir Ásdís, en hún hyggst jafnframt nýta dvölina til að koma fatalínu sinni á framfæri við Búlgara. „Ég er í samstarfi við þrjár verksmiðjur í Sófíu og er bara að vinna með þeim."

Ásdís kann vel við sig í Sófíu, segist njóta heitu sumarkvöldanna í Búlgaríu. Og eins og Fréttablaðið hefur þegar greint frá kemur út á fimmtudaginn þýskt Playboy þar sem fyrirsætan íslenska prýðir fjórar opnur, heilar átta blaðsíður. „Þetta er sami myndaþátturinn og birtist í búlgarska Playboy, þeir keyptu bara myndir úr honum."- fgg