Lér konungur fékk flestar tilnefningar

Sýningin Lér konungur hlýtur flestar tilnefningar til Grímuverðlaunanna í ár. Tilkynnt var um tilnefningarnar í gær, en verðlaun eru veitt í sextán flokkum.

Sýningin Lér konungur sem sýnd var í Þjóðleikhúsinu síðasta vetur hlaut tíu tilnefningar til Grímunnar; hún var tilnefnd sem besta sýningin, leikstjórinn hlaut tilnefningu og fjórir leikarar voru tilnefndir auk þess sem tónlistin, leikmynd, búningar og lýsing hlutu öll náð fyrir augum dómnefndar Grímunnar. Fólkið í kjallaranum sem sýnt var í Borgarleikhúsinu hlaut sjö tilnefningar. Aðrar sýningar sem eru áberandi fyrirferðarmiklar á lista dómnefndar eru Elsku barn og Allir synir mínir.

Bestu sýningar leikársins þykja Allir synir mínir, Elsku barn, Fjalla-Eyvindur, Fólkið í kjallaranum og Lér konungur. Bestu leikstjórarnir eru leikstjórar þessara verka fyrir utan að Marta Nordal, leikstjóri Fjalla-Eyvinds, er ekki tilnefnd en Jón Páll Eyjólfsson, leikstjóri Strýhærða Péturs, hlýtur náð fyrir augum dómnefndar.

Elísabet Brekkan, leikhúsgagnrýnandi Fréttablaðsins, var nokkuð ánægð með tilnefningar til bestu sýninga. „Það skal engan undra þótt Allir synir mínir sé tilnefnt því það er svo mikil unun að fá að heyra góðan texta og leikara sem fara vel með hann. Sýning Leikfélags Reykjavíkur, Elsku barn, var áhrifamikil sýning þar sem leikarar og allir sem að henni komu unnu af alúð á framsetningu á mjög erfiðu máli. Leikgerð Ólafs Egils Egilssonar á Fólkinu hennar Auðar Jónsdóttur í kjallaranum var vel leikin og sýningin gekk vel upp, var í senn gróf og fyndin. Sjónarspilið um Lé konung og öll hans svik í 32 mínútna rigningu á stóra sviði Þjóðleikhússins fær hér tilnefningu af mörgum ástæðum og Arnar Jónsson átti hér vitaskuld stjörnuleik, reyndar ásamt fleirum. Fjalla-Eyvindur í leikstjórn Mörtu Nordal var einstök sýning. Líklega hafa allt of fáir séð hana, enda aðeins sýnd í örfá skipti úti á Norðurpól,“ segir Elísabet.

Grímuverðlaunin verða afhent 16. júní.