Skrifa dramatíska gamanþætti

„Við erum á fullu að skrifa. Ef það gengur vel fer verkefnið á næsta stig,“ segir leikstjórinn Gunnar Björn Guðmundsson, sem vinnur nú ásamt Önnu Svövu Knútsdóttur og Gunnari Helgasyni að handriti nýrra sjónvarpsþátta sem verða sýndir á RÚV. „Þátturinn heitir Þorpið,“ segir Gunnar. „Þetta er svona gríndrama. Þættirnir fjalla um leikara sem er rekinn úr Þjóðleikhúsinu vegna áfengisneyslu og fer út á land að leikstýra áhugaleikhópi.“

Eru þættirnir byggðir á raunverulegum atburðum?

„Jaaa… þeir saumast inn í. Við erum öll með góða reynslu af leikstjórn úti á landi og leikhúsheiminum.“ Anna Svava flytur til útlanda í vikunni en Gunnar segir að hún muni ekki yfirgefa handritsteymið. „Við stefnum á ákveðinn stað. Svo verður tekið hlé þegar hún fer, þótt við verðum eitthvað að vinna í þessu á meðan hún er úti,“ segir hann.

Óvíst er hvenær tökur á þáttunum hefjast og því er eðli málsins samkvæmt óvíst hvenær þeir verða sýndir. Þá segir Gunnar óvíst hvaða leikarar fari með hlutverk í þáttunum. „Það þarf í fyrsta lagi að skrifa þættina. Svo hefst fjármögnun ef allt gengur vel. Þau eru allavega hrifin á RÚV,“ segir hann.- afb