Berjast við vampírur

Spennumyndin Dylan Dog: Dead of Night með Anitu Briem í einu af aðalhlutverkunum var frumsýnd í Laugarásbíói í gær.

Myndin er byggð á samnefndri ítalskri teiknimyndasögu um einkaspæjarann Dylan Dog, sem hefur hæfileika til að kljást við vampírur, varúlfa og uppvakninga. Með aðstoð uppvakningsins Marcusar Adams (Sam Huntington) rannsakar hann grunsamlegt mál Elizabeth Ryan (Anita Briem). Í von um að leysa málið þurfa þau að berjast við óvætti næturinnar og virðist það engan endi ætla að taka.

Myndin hefur fengið slaka dóma. Á síðunni Imdb.com fær hún 5,1 af 10 mögulegum og Hollywood Reporter segir að möguleg kvikmyndaröð um Dylan Dog sé andvana fædd.

Brandon Routh, sem lék Ofurmennið í hinni misheppnuðu Superman Returns, fer með hlutverk Dylan Dog. Hann sást síðast á hvíta tjaldinu í Scott Pilgrim vs. the World sem fékk fínar viðtökur. Síðasta mynd Anitu Briem kom út fyrir þremur árum, en það var Journey to the Centre of the World, þar sem Brendan Fraser var í aðalhlutverkinu.

Önnur mynd frá Anitu er væntanleg á árinu, söngvamyndin You, Me & Circus.