Khat-mennirnir hafa áður komið til Íslands

Lögreglan lagði í byrjun vikunnar hald á sextíu kíló af fíkniefninu khat, sem var á leið úr landi til Bandaríkjanna og Kanada. Fjórir menn voru handteknir vegna málsins og úrskurðaðir í gæsluvarðhald til 31. maí á grundvelli rannsóknarhagsmuna.

 

Mennirnir eru allir breskir ríkisborgarar. Einn þeirra er af sómölskum uppruna, en þar í landi er mikið ræktað af khati. Tveir mannanna eru um fertugt, einn um fimmtugt og sá fjórði hálfsextugur.

 

Talið er að mennirnir hafi komið með efnið í ferðatöskum frá London og hafi sloppið fram hjá tollvörðum í Leifsstöð, að sögn Kára Gunnlaugssonar, yfirtollvarðar á Keflavíkurflugvelli.

 

Tollverðir fundu hins vegar skjöl í annarri tösku sem komu þeim á sporið, og urðu til þess að efnið fannst við tollskoðun þegar átti að senda það vestur um haf.

 

Mennirnir voru í kjölfarið handteknir á gistiheimili í Reykjavík. Nánari eftirgrennslan leiddi enn fremur til þess að sending sem fór héðan til Frakklands var kyrrsett þar ytra. Í sendingunni fannst ámóta magn af efninu og hér heima. Talið er að málin tengist.

Kári segir sennilegt að menn hafi nýtt Ísland sem eins konar umskipunarhöfn efnanna til að villa um fyrir yfirvöldum, þar sem síður sé leitað eftir efninu í sendingum frá Íslandi en frá Bretlandi, þar sem efnið er löglegt.

 

Kári segir að mennirnir sem nú séu í haldi hafi komið áður til Íslands, og það fyrr í þessum mánuði. Rannsóknin beinist meðal annars að því hversu margar ferðir þeirra hingað hafi verið og hvaða tilgang þær hafi haft. Ekkert þykir benda til að Íslendingar tengist málinu. Lögregla hefur enn fremur ekki orðið vör við að efninu sé dreift og þess neytt hér á landi.

 

Þetta er í annað sinn sem khat finnst hérlendis. Í ágúst í fyrra voru Breti og Lithái handteknir með 39 kíló af efninu í fórum sínum.

 

stigur@frettabladid.is