Tískuföt á meðgöngu

„Ég gekk út frá því að fötin væru ekki frábrugðin venjulegum hversdagsfatnaði, nema að því leyti að hægt væri að gefa brjóst og að flíkurnar yxu með konunni á meðgöngunni," segir Hera Guðmundsdóttir, nemandi í fatahönnun við LHÍ, en lína hennar bar sigur úr býtum í samkeppni um meðgöngu- og brjóstagjafafatnað sem verslunin Tvö líf stóð fyrir.

Hera fékk innblástur frá indverskum sari og þeirri staðreynd að indverskar konur klæðast ekki öðru en þær gera venjulega meðan á meðgöngu stendur.

„Ég skoðaði mikið vafninga, kjóla sem bundnir eru utan um líkamann og hálsmál þar sem auðveldlega má gefa brjóst. Ég studdist líka við reynslusögur vinkvenna sem eiga börn og mömmu mína. Efnin valdi ég út frá þægindum en ekki síður gæðum, að flíkurnar líti eins út eftir níu mánuði og þoli mikinn þvott," segir Hera.

Þessi atriði gerðu einmitt útslagið þegar kom að því að velja sigurvegarann að sögn Sigríðar Láru Einarsdóttur, annars eigenda Tveggja lífa.

„Hera hannaði tískuflíkur sem endast þessi tvö ár og lengur. Hún lagði einnig áherslu á góð efni sem skiptir okkur miklu máli. Nú tekur við þróunarvinna í samvinnu við Heru og að afla styrkja til að framleiða flíkurnar," segir Sigríður Lára en stefnt er að því að selja línuna bæði hér á landi og erlendis.

„Við ætlum okkur að keppa með þessar vörur á alþjóðamarkaði. Við munum framleiða það sem við getum hér á Íslandi en draumurinn er að línan verði komin í verslanir árið 2013, en það veltur auðvitað á því hvernig gengur að fjármagna verkefnið. Þetta er í rauninni fyrsta íslenska sérhannaða meðgöngulínan af þessari stærðargráðu, ætluð fyrir erlendan markað og gamall draumur okkar Ásdísar Birtu Gunnarsdóttur að rætast," segir Sigríður.

Spurð hvort sigur í keppni sem þessari hafi mikla þýðingu fyrir ungan fatahönnuð í námi segir Hera spennandi að fá að kynnast praktískum hluta fatahönnunargeirans.

„Þetta var mjög skemmtilegt og krefjandi að hanna fyrir afmarkaðan kúnnahóp með sérþarfir. Það er líka alltaf gaman að fá viðurkenningu á því sem maður er að gera."

heida@frettabladid.is