Árni Sveinsson frumsýnir nýja mynd í Hörpu

Kvikmyndagerðarmaðurinn Árni Sveinsson er að leggja lokahönd á heimildarmyndina Video, sem fjallar um stöðu tónlistarmyndbandsins í dag. Myndin verður frumsýnd í bíósal Hörpunnar 16. maí og verður hún eingöngu sýnd þar.

„Tónlistarmyndbandið er ungt form en hefur samt breyst ótrúlega mikið,“ segir Árni, sem síðast leikstýrði vel heppnaðri heimildarmynd um Ragga Bjarna. „Það er ekkert svo langt síðan útlit var fyrir að það væri að deyja drottni sínum. Stóru fyrirtækin voru efins um að setja peninga í þessi myndbönd því stóru stöðvarnar eins og MTV voru að hrynja,“ bætir hann við.

„Síðan hefur það gerst síðastliðin tvö til þrjú ár með netbylgjunni eins og Youtube og Facebook að staðan hefur gjörbreyst. Myndbandið er orðið leið fyrir hljómsveitir til að gera sín eigin myndbönd utan við eitthvert fyrirtæki. Með netmiðlinum ná þær að kynna sig og tónlistina sína á allt annan hátt.“

Árni er reyndur í gerð tónlistarmyndbanda því hann hefur unnið fyrir hljómsveitir á borð við GusGus, Quarashi og Retro Stefson á ferli sínum. Fyrstnefnda hljómsveitin kemur einmitt við sögu í nýju myndinni, auk poppbandsins Berndsens og fleiri hljómsveita. Nýja heimildarmyndin verður um 35 mínútna löng og er samstarfsverkefni Árna og Hörpunnar. Vinnan hefur staðið yfir undanfarna mánuði og hlakkar Árni mjög til að sýna hana í Hörpusalnum, sem tekur um 120 manns í sæti.

Leikstjórinn er með fleiri járn í eldinum því heimildarmynd hans Backyard, sem fjallar um nokkrar íslenskar hljómsveitir, hefur verið valin til sýninga á tveimur alþjóðlegum kvikmyndahátíðum, í Karlovy Vary í Tékklandi og Seattle í Bandaríkjunum. Hátíðin í Tékklandi er ein sú elsta og virtasta í heiminum og verður haldin 19. maí til 12. júní.

Backyard kemur út á mynddiski á Íslandi í byrjun júní og einnig kemur út geisladiskur með tónlist úr myndinni. Myndin verður svo gefin út á mynddiski á alþjóðavísu í september.

freyr@frettabladid.is