Leiðarljós snýr aftur á dagskrá

„Við erum búin að reyna mikið og loksins tókst okkur að ná samningum til eins árs," segir Sigrún Stefánsdóttir, dagskrárstjóri RÚV. Leiðarljós, sjónvarpssápan vinsæla, snýr aftur á dagskrá Ríkissjónvarpsins um leið og HM U-21 lýkur í lok júní.

Sigrún viðurkennir að mikið hafi verið skrifað og mikið hafi verið spurt og margir hafi skammað Sjónvarpið fyrir að taka af dagskrá sápuna sem hefur fylgt áhorfendum RÚV í áraraðir. „Þetta fór af dagskrá í kringum handboltann í fyrra og nú höfum við gengið frá þeim atriðum sem hafa staðið í vegi fyrir því að þættirnir kæmust aftur á dagskrá." Leiðarljós, eða Guiding Light, er ein elsta sápuópera heims en framleiðslu þáttanna var hætt fyrir tveimur árum.

Íslenskir áhorfendur þurfa hins vegar engu að kvíða því Sjónvarpið hefur í fórum sínum nóg af þáttum. „Þetta er samningur til eins árs og upp á 192 þætti. Við munum örugglega hlaupa yfir einhver ár en ég held að þetta verði mörgum mikill gleðiauki og fólk getur farið að hlakka til."- fgg