Ég bjóst við skömmum

„Ég þvælist mikið um á fisflugvél og hef lent á yfir 100 flugvöllum á Íslandi, sem langflestir eru óskráðir, en líka á 130 stöðum utan valla, Það er ekki síður landið sem togar í mig en flugið," segir Styrmir Bjarnason, stofnandi og framkvæmdastjóri T1 Hugbúnaðarhúss.

Hann kveðst hafa kynnst þunna loftinu í kringum aldamótin er hann hóf að fljúga á svifvæng. Síðan eignaðist hann franska fisflugvél með tveimur öðrum og eftir það hefur hann flogið í um 150-180 tíma á ári.

„Þetta er tiltölulega ódýrt sport því fisvélarnar eyða litlu," lýsir hann og segir fisvélar kvikar og kröftugar því í þeim sé 100 ha hreyfill en tómar vegi þær 250 kíló. „Svo geta þær flogið á allt frá 50 km hraða upp í 180 og henta mér vel því ég hef líka mjög gaman af að taka myndir."

Styrmir neitar því ekki að hafa lent í brasi á fisinu. Segir varla annað hægt þegar flogið sé jafn mikið og hann gerir.

„Ég afrekaði það fyrir tveimur árum að fljúga á raflínu. Var að koma frá Gullfossi og flaug niður með gljúfri Hvítár þar sem ég hugðist lenda en þar er langt haf milli raflínustaura. Þetta var einföld sveitalína en ég var svo heppinn að hún lenti á góðum stað á vélinni þannig að hún slitnaði. Púlsinn fór töluvert upp en ég setti á fullt afl og fann að vélin brást rétt við og svo lenti ég á túni í grenndinni.

Bóndinn á bænum kom á vaðandi siglingu á fjórhjóli og ég bjóst við skömmum. Þá kom í ljós að hann hafði flogið með mér sumarið áður svo við vorum málkunnugir og meðan ég beið eftir lögreglunni bauð hann mér heim í kaffi.

Á veröndinni var maður að pumpa gamaldags prímus og ég, borgardrengurinn, spurði: „Hvað, eruð þið enn að nota svona prímusa?" Þá svaraði hinn kurteislega. „Já, við erum nú bara rafmagnslaus hér þessa stundina."

Styrmir kveðst yfirleitt vera í slagtogi með öðrum í fluginu. „Við fljúgum mikið tveir og tveir saman öryggisins vegna, hvor á sinni vél. Leggjum oft af stað síðdegis, finnum okkur bændagistingu á leiðinni og lendum á vegum eða í fjörum því ef við höfum einhvern vind þurfum við bara 100-150 metra braut," lýsir hann og bætir við að lokum.

„Alls staðar er tekið vel á móti manni. Flugið er svo jákvætt í hugum Íslendinga."

gun@frettabladid.is