Eignast barn með dóttur Stewarts

Ein stærstu tíðindin í heimi fræga og ríka fólksins eru þau að Kimberly Stewart er ólétt. Það eitt og sér er auðvitað ekki fréttaefnið heldur sú staðreynd að pabbinn er Óskarsverðlaunaleikarinn Benicio Del Toro. Og þau tvö eru ekki par. Og hafa engar háleitar hugmyndir um að verða par í nánustu framtíð.

Kimberly þessi er dóttir kvennabósans Rods Stewart og líkt og faðir hennar hefur hún ekki verið við eina fjölina felld undanfarin ár. Kimberly hefur átt vingott við alls konar smástirni á undanförnum árum og líka stórstjörnur á borð við Jude Law og Rhys Ifans. Hún varð hins vegar ólétt eftir einnar nætur gaman með Del Toro og samkvæmt breskum fjölmiðlum sýnir hann þessu mikinn skilning og hyggst styðja þétt við bakið á stúlkunni.

Ekkert hefur hins vegar frést af viðbrögðum afans sem eignaðist sitt áttunda barn fyrir skemmstu með fyrirsætunni Penny Lancaster.