Ævintýri að spila með Allen

Samúel Jón Samúelsson er mjög spenntur fyrir tónleikum Stórsveitar sinnar og nígeríska trommuleikarans Tony Allen. Þeir hittust fyrst á klúbbi í London og hafa verið í sambandi síðan.

Stórsveit Samúels Jóns Samúelssonar spilar í Tjarnarbíói 1. júní á Listahátíð í Reykjavík með einu af átrúnaðargoðum hans, nígeríska trommuleikarum Tony Allen.

Fréttablaðið greindi á síðasta ári frá fundi þeirra Samúels og Allen á tónlistarhátíðinni Nattjazz í Noregi. Þá reyndi Samúel að fá hann til Íslands og tók Allen vel í það. „Ég hitti hann fyrst fyrir nokkrum árum baksviðs þegar hann var að spila á sama klúbbi og Jagúar í London. Ég spjallaði við hann og setti mig svo í samband við umboðsmann hans. Ég reyndi að fá hann til Íslands 2008 en það gekk ekki. Svo hitti ég hann aftur í vor og hafði í kjölfarið samband við umboðsmanninn. Núna er búið að lenda þessu,“ segir Samúel og er að sjálfsögðu sáttur við niðurstöðuna. „Hann kemur hérna og æfir aðeins með okkur og svo höldum við þessa tónleika. Þetta verður geðveikt ævintýri.“

Tony Allen er þekktur fyrir að hafa spilað með landa sínum Fela Kuti í rúman áratug og er einn af mönnunum á bak við „afrobeat“-tónlistarstefnuna. Undanfarin ár hefur hann spilað með ýmsum flytjendum, þar á meðal Damon Albarn, Flea, Sebastien Tellier og frönsku hljómsveitinni Air.

Spurður út í frekara samstarf við Allen segir Samúel: „Við sjáum bara til. Ég stefni á að vera með nýja músík á prógramminu og ég ætla líka að taka upp tónleikana. Við sjáum til hvað kemur út úr þessu.“freyr@frettabladid.is