Tónleikaferð um Evrópu

Hljómsveitin Rökkurró er á leiðinni í stutta tónleikaferð um Evrópu þar sem spilað verður á átta tónleikum. Þeir fyrstu verða á staðnum Windmill í London 13. apríl en þeir síðustu í Engelesburg í Þýskalandi 21. apríl. Ferðinni verður einnig heitið til Hollands og Belgíu.

Á tónleikunum verður fylgt eftir annarri plötu sveitarinnar, Í annan heim, sem kom út í fyrra. Um upptökustjórn hennar sá Alex Somers, kærasti og samstarfsmaður Jónsa í Sigur Rós. Fyrsta plata Rökkurróar, Það kólnar í kvöld, kom út árið 2007 við góðar undirtektir.

Hér fyrir ofan má sjá myndbandið við lagið Sólin mun skína með Rökkurró.