Gleypir rakvélarblöð á töfrasýningu

„Þetta er það persónulegasta sem ég hef gert. Ég er rokkari og töframaður og þarna flétta ég því saman," segir Ingó Geirdal sem verður með töfrasýningu í Austurbæ sunnudaginn 13. mars.

„Þetta verður einn og hálfur tími með hléi. Ég gleypi þarna rakvélarblöð, læt setja mig í spennitreyju, beygi hnífapör með hugarorkunni, les hugsanir og fleira. Þetta verður svolítið krassandi," segir Ingó, sem hefur einnig spilað á gítar með hljómsveitum á borð við Dimmu og Quarashi. Tónlist Dimmu mun einmitt hljóma á sýningunni.

Hann er nýfluttur heim eftir þriggja ára dvöl í Svíþjóð. Þar sýndi hann töfrabrögð á skemmtiferðaskipum milli Svíþjóðar og Danmerkur. Hann var einnig ráðinn til að skemmta á Norðurlandamóti töframanna og í einkaboðum, m.a. fyrir hljómsveitina Depeche Mode.

Ingó hefur fengist við töfrabrögð síðan hann var tíu ára. „Upphaflega byrjaði ég að læra á gítar. Ég hugsaði að það væri ágætis leið til að þjálfa fingurna því maður þarf að vera mjög fingrafimur í töfrabrögðum og með góðar tímasetningar. Svo vatt það upp á sig og maður er orðinn töframaður og tónlistarmaður. Á þessari sýningu minni í Austurbæ mun ég í rauninni í fyrsta skipti tengja þetta saman." - fb