Jógvan er á ferð og flugi um landið með Friðriki Ómari um þessar mundir og var staddur í Neskaupstað þegar Fréttablaðið náði tali af honum. Á dögunum gafst honum hins vegar laus stund til að skella sér í Langána ásamt Arngrími Fannari (Adda Fannari), Hans Hjalta Skaale, frænda sínum frá Færeyjum, og svila sínum.
Veiðiferðin var mikil frægðarför því Jógvan krækti í vænan lax, fimmtán pund og 90 cm. Hann var hins vegar ekki rotaður eins og lög gera ráð fyrir heldur settur í ker því meiningin er að nota hann til undaneldis.
Þetta er þriðja árið sem Jógvan tekur veiðimennskuna föstum tökum. Hann hefur verið fastagestur í Langá en auk þess veitt í Selá og Veiðivötnum. „Ég er mjög vel giftur, tengdapabbi minn er veiðivörður í Langánni, bræður hans sjá um ána og þeir kynntu mig fyrir þessari íþrótt.“
Söngvarinn kveðst hafa fallið fyrir veiðiskapnum, hann hafi fundið veiðimanninn innra með sér og nú geti hann ekki hugsað sér betra frí. „Úti í ánni ríkir bara ró og friður, þarna er ekkert net og slökkt á öllum símum. Þetta er bara ég að hlusta á vatnið, hin fullkomna afslöppun.“- fgg
