Birgitta æfir fótbolta í Barcelona

„Ég æfði fótbolta sem barn en hef ekki sparkað í bolta í fimmtán ár. En það er þarna kvennalið í skólanum og ég ákvað bara að reima á mig takkaskóna og mæta. Þarna ræður leikgleðin ríkjum og þótt ég sé ekki með þeim bestu er ég ekki með þeim verstu. Og það ræður kannski mestu um það að ég mæti alltaf,“ segir söngkonan Birgitta Haukdal, sem æfir fótbolta með skólaliði í Barcelona, en þar hafa hún og eiginmaður hennar, Benedikt Einarsson, komið sér fyrir ásamt syninum Víkingi Brynjari.

Birgitta er hins vegar stödd hér á landi um þessar mundir til að kynna nýja sólóplötu sína sem er væntanleg í verslanir á næstu dögum. Hún verður gestadómari í sjónvarpsþættinum Dans, dans, dans í kvöld og hyggst þar syngja lag af plötunni sem hún vann í samstarfi með Þorvaldi Bjarna. Á plötunni er að finna lög eftir þau tvö en einnig lög eftir reynslubolta á borð við Egil Ólafsson og Þóri Úlfarsson. „Ég lét það svona ganga í tónlistarheiminum að ég væri að gera kraftballöðuplötu og væri að leita að lögum. Og viðbrögðin voru ótrúleg, ég fékk lög frá bæði þekktum og óþekktum tónlistarmönnum, frá fólki í underground-tónlistinni, klassík, þungarokki og allt þar á milli,“ segir Birgitta.

Og söngkonan hefur komið sér vel fyrir í katalónsku höfuðborginni og sonurinn Víkingur unir sér vel í skóla þar sem hann lærir bæði ensku og spænsku þrátt fyrir ungan aldur. „Hann er í skólanum hálfan daginn,“ segir Birgitta sem er sjálf ekki alveg komin jafnlangt í spænskukunnáttunni og hún hefði viljað, en þar hefur spilað mikið inn í vinnan við nýju plötuna. „Ég hef bara sjálf verið að læra heima en þetta kemur allt saman núna þegar vinnan við plötuna er frá.“- fgg