Erpur heldur keppni - Önnur leiðin til Færeyja í vinning

Rapparinn Erpur Eyvindarson, BlazRoca, hefur blásið til keppni í samvinnu við Prikið og fleiri aðila þar sem hann hvetur tónlistarmenn til að endurhljóðblanda lög sín á sem flottastan máta. Með honum í dómnefnd eru President Bongo úr Gusgus og Óttarr Proppé borgarfulltrúi.

Þeir munu hlusta á lögin sem berast og velja sigurvegarann. Vinningarnir ekki af verri endanum, eða þannig. Í fyrstu verðlaun eru ferð aðra leiðina til Færeyja með Norrænu, í önnur verðlaun eru ferð aðra leiðina til Vestmannaeyja og í þriðja sæti eru verðlaunin ferð aðra leiðina út í Viðey.

Aukavinningarnir eru síðan ýmsir en nánari upplýsingar um keppnina, hlekkir á lög og fleira má nálgast á heimasíðunni prikid.is. Erpur skrifar af þessu tilefni skemmtilegt bréf til þátttakenda:



„Kæru halar og hosur.

Án þess að fitla of mikið við sjálfan mig vil ég segja að KópaCabana er stærsta íslenska tónlistarstykki seinustu ára. Enda fengið toppdóma frá öllum fjölmiðlum og átt flest vinsælustu lög seinustu ára (Allir fá sér, Keyrumettígang, Reykjavík Belfast, Viltu dick?, Stórasta landið, Má ég koma heim?, Elskum þessar mellur o.s.frv.).

Hún hefur selst í skipsförmum (gámaskip sko), verið gríðarleg vítamínssprauta fyrir hiphoppsenuna (sem enn og aftur er blessunarlega komin upp á yfirborðið), náð langt út fyrir ramma rappgeirans og látið ótrúlegasta fólk reyna að leika eftir hispursleysið (rólegur Jónsi).

Platan er kominn í sögubækurnar, ber titillinn "Plata ársins" á Hlustendaverðlaunum FM957 og hefur neglt inn hjá þjóðinni ófáum frösum, slangri og hugtökum. Vissulega er þetta platan mín en nauðsynlegt að átta sig á því að hún er unnin í samvinnu við þvílíka fagmenn í taktsmíði og rímnamöndli sem margir hverjir voru lítið þekktir fyrir sín afrek áður en platan leit dagsins ljós.

Nú er tækifærið fyrir alla faghala og hosur að fleygja sinni tónsmíð undir snilldina og gera sig gildandi. Og frelsið er yndislegt, rímixin þurfa ekkert endilega að vera í hiphoppkantinum. Allt er opið fyrir endurhljóðblandanir í formi ryþmablús, grime, dancehall, dubstep, timba, black metal, breakbeat, congahouse, dauðarokk, skottís, grindcore, kántrý, gayteknó, rúmba, reggaeton, garage, emo, gröns, ambient, klassík, riverdance, blús, jazz, kuduru og svo fukkin framvegis.

Til að undirstrika þetta spannar dómnefndin mjög víðan skala tónlistarmanna... og djöfull hlakkar mig til að heyra þessi goodsjitt rímix!



-BlazRoca-



P.s. Sæll venööö"