Láta drauminn rætast og opna förðunarskóla

„Þetta hefur verið draumur hjá mér frá því ég byrjaði að læra förðun“ segir Eygló Ólöf Birgisdóttir sem nýverið opnaði förðunarskólann Mood Make Up School ásamt Magneu Elínardóttur og Díönu Björk Eyþórsdóttur.

„Þegar ég sagði Magneu frá þessum draumi mínum kom í ljós að hún gekk með sama draum í maganum. Við ákváðum að sameina krafta okkar og höfum verið að undirbúa opnun undanfarið ár.“

Eygló hefur unnið í faginu frá því að hún útskrifaðist árið 2006, meðal annars við kennslu, sem verslunarstjóri hjá MAC og er sminka hjá Ríkissjónvarpinu. Einnig hefur hún gert fjöldann allan af auglýsingum og tískuþáttum. Magnea hefur svipaða ferilskrá en þær tvær sjá um alla kennslu í skólanum. Díana Björk sér svo um allan rekstur en hún er menntaður förðunar- og viðskiptafræðingur.

Frá því að stöllurnar opnuðu vefsíðu skólans moodschool.is fyrir stuttu hefur áhuginn verið mikill og þó nokkrir búnir að skrá sig á námskeið í haust. Kennt verður á snyrtivörur frá MAC og fá nemendur vörupakka þaðan.

„Við ætlum að einbeita okkur að þvi að kenna nemendum okkar að vinna við fagið og leggjum áherslu og tísku, ljósmyndir og sjónvarp,“ segir Eygló en einnig verðu kennt á airbrush og förðun fyrir háskerpulinsu.

„Við Magnea erum á kafi í þessu og vinnum við förðun á hverjum degi. Þess vegna finnst okkur gaman að geta miðlað einhverju áfram til nemenda. Við höfum allar mikinn metnað og ástríðu fyrir faginu sem á eftir að endurspeglast í skólanum og kennslunni,“ segir Eygló en fyrsta námskeiðið hefst í byrjun september og eru bæði kvöld- og morgunnámskeið í boði.

- áp