Litli bróðir Ingós með lög unga fólksins á hreinu

Söngvarinn Ingó tekur yngri bróður sinn Guðmund stundum með upp á svið, enda sá yngri liðtækur söngvari.

„Hann er stundum með. Það er gaman fyrir mig, enda þreytandi að vera alltaf einn. Það er gott að fá einhvern sem syngur,“ segir tónlistarmaðurinn Ingólfur Þórarinsson, betur þekktur sem Ingó.

Ingó tróð upp á skemmtistaðnum Oliver á fimmtudagskvöld ásamt Guðmundi bróður sínum. Ingó hefur æ oftar fengið Guðmund til að troða upp með sér, en sá yngri er ekki síður liðtækur söngvari og skemmtikraftur en sá eldri. „Ég er að hjálpa honum að vinna sér inn smá pening áður en hann fer til Vestmannaeyja,“ segir Ingó, en Guðmundur spilar fótbolta með ÍBV í Pepsi-deildinni og undirbúningstímabilið er skammt undan.

Guðmundur og Ingó eru frá Selfossi, en þar hefur sá yngri komið reglulega fram undanfarin misseri á meðan sá eldri hefur troðið upp um allt land. Ingó segir að Guðmundur hafi ekki stokkið á tækifærið að koma fram með honum í höfuðborginni, „Hann var aðeins tregur að gera það,“ segir Ingó. „En ef við erum tveir, þá lætur hann vaða. Hann hefur líka tekið í bongótrommu, hann man ekki alveg lögin á gítar. Ef hann er með bongó er hann góður.“

En er ekki hættulegt að vera með yngri útgáfu af þér með á sviðinu? Verður hann ekki bókaður einn á Oliver innan tíðar?

„Það endar örugglega þannig. Síðast voru stelpurnar líka meira utan í honum. Það var gaman að vera í þeirri stöðu, þá veit maður hvernig Veðurguðunum leið í gamla daga,“ segir Ingó í léttum dúr.

Ingó segir þá bræður bæta hvor annan upp. Guðmundur er rétt tæplega tvítugur en Ingó kominn á miðjan þrítugsaldurinn. Áherslurnar eru því ólíkar. „Hann er með FM-prógrammið á hreinu. Þessi vinsælu lög hjá unga fólkinu. Þannig að hann smellpassar í Oliver-stemninguna,“ segir Ingó léttur. „Hann er lélegur í Creedence, Bítlunum og Bubba, en góður í Chris Brown og Rihönnu.“

atlifannar@frettabladid.is