Með gítarinn í kjöltunni

Smári Tarfur er að undirbúa plötu þar sem hann spilar á kjöltugítar og syngur með. Hann hitar upp fyrir átrúnaðargoð sitt síðar í mánuðinum.

Tónlistarmaðurinn Smári Tarfur hefur verið að fikra sig áfram sem kjöltugítarleikari og ætlar að taka upp sína fyrstu sólóplötu í vetur þar sem hann syngur sjálfur í fyrsta sinn. Hann hitar upp fyrir átrúnaðargoð sitt Kelly Joe Phelps sem kemur fram ásamt Corrine West á fernum tónleikum á Íslandi seinna í október.

„Ég byrjaði að spila „slide“ fyrir kannski þremur árum í þessum kjöltustíl. Út frá því ákvað ég að láta reyna á sönginn í leiðinni,“ segir Smári, sem er þekktur fyrir gítarleik sinn með Quarashi. Tveir mánuðir eru síðan hann byrjaði að koma fram opinberlega með gítarinn í kjöltunni og það var einmitt Kelly Joe Phelps sem veitti honum innblásturinn. „Hann hóf feril sinn svona og að auki hef ég lengi verið mjög hrifinn af því þegar fólk er bara eitt með gítar og syngur. Það er mjög berskjölduð útgáfa af tónlist,“ segir hann og er mjög spenntur fyrir upphituninni fyrir Phelps og West. „Ef einhver hefði sagt mér að ég væri að fara að hitta uppáhaldsgítarleikarann minn veit ég ekki hvert ég hefði farið. Það er mér mikill heiður að fá að hita upp fyrir Michael Jordan kassagítarsins.“

Smári ætlar að taka upp sína fyrstu plötu með kjöltugítarinn að vopni í vetur á fjölrása segulband. Hún verður tekin upp um leið og hann spilar og syngur á sama tíma inn á segulbandið. Fyrst ætlar hann þó að öðlast meiri reynslu við að koma fram. „Ég vil leyfa röddinni aðeins að slípast til. Gamli söngvarinn í AC/DC sagðist hafa skolað munninn vel með viskíi bæði fyrir upptökur og tónleika. Ég veit ekki alveg hvort ég fari í þau trix.,“ segir hann hress.

Smári var í hljómsveitinni Hot Damn ásamt Jenna í Brain Police og síðast komu þeir fram saman fyrir fjórum árum. „Hann skildi mig bara eftir með tárin í augunum og flutti út til annars lands. Ég hugsaði með mér að ég yrði bara að syngja sjálfur, fyrst Jenni var farinn úr lífi mínu.“

Eitthvað er um að íslenskir gítarleikarar spili á kjöltugítar en ekki er vitað til þess að þeir syngi líka. Smári segir töluvert öðruvísi að spila á slíkan gítar en venjulegan gítar. „Að mörgu leyti finnst mér það skemmtilegra. Þú færð hljóðið til þín þegar þú ert að spila á „slide“ en þegar þú ert að spila á annars konar gítar fer hljóðið frá þér.“ Myndband með gítarleik Smára má finna á Youtube.

Miðasala á tónleika Phelps og West, þar sem Smári og Beggi Smári hita upp , er hafin á Midi.is. Þau munu koma fram í Reykjavík, á Akureyri, Laugarbakka og í Stykkishólmi 19. til 22. október. Hljómsveitin Ylja verður sérstakur gestur á Laugarbakka og í Stykkishólmi.

freyr@frettabladid.is