Fékk steypuklump í afmælisgjöf

„Þetta er búin að vera hefð í mínum vinahópi að gera eitthvað svona. Ég átti von á ýmsu en kannski ekki akkúrat þessu," segir Páll Sveinsson, starfsmaður hugbúnaðarfyrirtækisins Hugvits.

Hann fékk klifurdót í fimmtugsafmælisgjöf frá vinum sínum, sem er ekki í frásögur færandi nema það að gjöfin var föst innan í risastórum 2,5 tonna steypuklumpi. Vinirnir festu uppátækið á filmu og settu á síðuna Youtube.

„Það óvenjulega við þessa gjöf er að hún er í rauninni pakki því hingað til hefur ekki tíðkast að gefa pakka heldur bara eitthvað sem ekkert gagn er að," segir Páll. Steypuklumpurinn var fluttur í krana heim til Páls. Hamar og meitill fylgdu með en á endanum fékk hann gröfu til að brjóta klumpinn upp og komast að gjöfinni. Það tók um tvær klukkustundir. „Hugmyndin var sú að ég yrði næsta hálfa árið að berja á þessu," segir Páll og hlær.

Hann minnist fertugsafmælis síns þegar hann fékk ísskrúfur sem eru notaðar til klifurs en böggull fylgdi því skammrifi. „Þær kosta alveg þokkalega mikinn pening en þeir fóru með ísskrúfurnar til járnsmiðs og suðu þær saman í skúlptúr þannig að þær urðu alveg gagnslausar. Það var rosalega svekkjandi."

Páll og vinahópur hans hefur gefið fleiri undarlegar „gjafir" í gegnum tíðina. Húsið hjá einum þeirra var málað bleikt, annar fékk sex tonna stein fluttan heim til sín með afmælisgrafskrift og sá þriðji, sem er mikill skíðamaður, hélt að hann hefði dottið í lukkupottinn þegar leigð var þyrla og flogið upp á Esjuna með skíði í farteskinu. Gleðin var skamvinn því hann var látinn labba niður á meðan vinir hans skíðuðu niður með bros á vör. - fb