Gullkálfurinn Kiddi seldi þrjátíu þúsund

„Við vorum duglegir strákarnir," segir gítar­leikarinn og upptökustjórinn Guðmundur Kristinn Jónsson, eða Kiddi í Hjálmum.

Plötur þar sem Kiddi og félagar hans héldu um stjórnartaumana seldust í yfir þrjátíu þúsund eintökum á síðasta ári. Mest seldust nýjar plötur með Hjálmum, Baggalút og Diskóeyjunni, ásamt jólaplötu Sigurðar Guðmundssonar. Söluhæst var Baggalúts­platan Næstu jól sem seldist í um 9.500 eintökum. Hinar þrjár plöturnar seldust í um fjögur þúsund eintökum hver um sig. Þar fyrir utan seldust eldri plötur ágætlega á árinu, þar á meðal með Hjálmum og barnaplatan Gilligill.

Kiddi stjórnaði að stórum hluta upptökum á plötunum og spilaði einnig inn á þær. Spurður hvort allt sem hann snerti verði ekki hreinlega að gulli segir hann: „Alls ekki. Ég gerði tribute-plötu til heiðurs Tony Joe White árið 2008 [Minni karla] og hún hefur ekki farið yfir tvö hundruð eintök. Það er stærsta floppið mitt. En það er góð plata og ég er sáttur við hana."

Á ekki að reyna að gera enn betur en þrjátíu þúsund eintök á nýju ári? „Verður maður ekki að dobbla þetta?" segir hann og hlær. „Við erum að gera alls konar skemmtilegt. Janúar og febrúar fara oft í að prufa alls konar hluti. Núna kemur tímabil þar sem maður leikur sér."

Þess má geta að þrjú gigg hafa verið bókuð erlendis hjá Hjálmum á árinu. Fyrst spila þeir á norsku bransahátíðinni by:Larm um miðjan febrúar og skömmu síðar í Sviss. Í júní verða þeir svo á reggíhátíð í Noregi. „Þeir eru búnir að biðja okkur mjög oft en það hefur aldrei hitt vel á. Núna sögðum við já."- fb