Ási í Smekkleysu í klóm Nígeríusvindlara

„Þetta er fyrst og fremst óþægilegt. Ég veit ekki hvort það verða einhver eftirmál af þessu,“ segir Ásmundur Jónsson, útgáfustjóri Smekkleysu.

Óprúttnir aðilar brutust inn í pósthólfið hans á dögunum og sendu út falskan póst undir hans nafni þar sem óskað var eftir fjárframlögum. Ástæðan var sú að Ásmundur átti að hafa verið í ferðalagi í Madríd á Spáni og hafði tapað öllum farangrinum sínum, þar á meðal peningunum. „Þeir hjá Google tengja þetta við IP-lausa tölvu í Nígeríu,“ segir Ásmundur, sem hafði einnig samband við lögregluna vegna málsins.Þetta er í fyrsta sinn sem hann fær heimsókn sem þessa inn í pósthólfið sitt og óskar engum að lenda í slíku.

„Maður hefur fengið vírusa. Ég hef verið með „makka“ sem hafa verið lausir við þetta en þá fékk ég þessa þvílíku heimsókn. Ég sendi Google póst og þar kom þessi „melding“ til baka um að líklega hafi verið ráðist inn í hólfið.“ Aðspurður segist Ásmundur sem betur fer ekki vita til þess að nokkur hafi látið glepjast af póstinum sem var sendur í hans nafni.

„Þetta er raunveruleiki heimsins. Það er fullt af lögbrotum í gangi, eins og við þekkjum vel úr tónlistarbransanum. Það er lykilatriði í mínum huga að löggjafinn virðist því miður hafa átt erfitt með að eiga við brot í netheimum. Það er mjög knýjandi verkefni í framtíðinni að leysa þau mál.“

- fb