Seldu upp fimm Hörputónleika á einum degi

Það er óhætt að segja að miðasalan á Frostrósatónleikana hafi farið af stað með látum í gær. Á aðeins fjórum tímum seldust um 12 þúsund miðar. Í hamaganginum seldust upp miðar á fimm tónleika í Eldborgarsal Hörpu.

Þeirra á meðal eru tónleikar þar sem norska söngkonan Sissel Kirkjebo kemur fram ásamt nokkrum af fremstu einsöngvurum þjóðarinnar en miðarnir á þá ruku út á aðeins um tíu mínútum.

Frostrósir fagna tíunda tónleikaárinu nú í desember og verða haldnir ríflega tuttugu Frostrósartónleikar á 13 stöðum víðs vegar um landið. Vegna þess hversu vel miðasalan gekk í gær var strax bætt við þremur aukatónleikum í Hörpu. Einnig hefur verið rífandi gangur í miðasölunni í dag.

Frostrósir munu gera víðreist um landið og í tilefni afmælisins verður tónleikaferðin sú viðamesta til þessa. Auk Reykjavíkur og Akureyrar og eiga nú allir landsmenn þess kost að sækja Frostrósatónleika í heimabyggð eða næsta nágrenni.

Jafnhliða tíu ára tónleikaafmæli Frostrósa er haldið upp á fimm ára tónleikaafmæli á Akureyri. Þar verða haldnir einstakir norðlenskir Frostrósatónleikar 17. desember þar sem stórsöngvarar Norðurlands sameinast Frostrósum. Nánari upplýsingar er hægt að fá á frostrosir.is og midi.is.