Setti heimsmet í annað sinn

„Þetta er sætur sigur og líka mikill léttir,“ segir Hlynur Gunnarsson, sem gerði sér lítið fyrir og setti heimsmet í „skateboard stationary manual“ í versluninni Brimi í Kringlunni um helgina. Metið fólst í því að standa sem lengst á framdekkjum á hjólabretti án þess að afturdekkin snertu jörðina. Hlynur hélt jafnvægi í 7,59 mínútur.

Þetta er í annað sinn sem Hlynur setur heimsmet í greininni. Í desember á síðasta ári bætti hann met bandaríska hjólabrettamannsins Rob Dyrdek. Sá var með 0,49 mínútur en Hlynur náði 3,05 mínútum. Í kjölfarið fékk hann skjal frá Guinness World Records því til staðfestingar. Sú sæla var hins vegar skammvinn því mánuði síðar var metið slegið af öðrum Bandaríkjamanni, Adam Zisa, með tímann 4,55 mínutur. Upp frá því varð Hlynur ákveðinn í að endurheimta titilinn.

„Ég ákvað núna að slá metið í fyrstu tilraun og binda þannig um hnútana í þetta sinn að enginn gæti snert það næstu árin,“ upplýsir Hlynur, sem hefur verið við botnlausar æfingar síðustu mánuði. Samhliða því hefur hann verið önnum kafinn við að fá viðurkennda aðila, þar á meðal vitni, ljósmyndara, kvikmyndatökumann, tímaverði og smið sem gekk úr skugga um að undirlagið væri fullkomlega lárétt, til að vera viðstadda viðburðinn eins og Guinness gerir kröfu um.

Hlynur er þegar búinn að senda öll gögn út til höfuðstöðva Guinness World Records í Bandaríkjunum og á ekki von á öðru en að hlutirnir gangi hratt fyrir sig. „Síðast liðu um átta vikur þar til ég fékk viðurkenningarskjal sent,“ bendir hann á og kveðst hlakka til að bæta öðru skjali upp á vegg heima hjá sér.

Inntur út í þann „fjarlæga“ möguleika að einhverjum takist að slá metið segist Hlynur viðbúinn því. „Þá set ég bara allt á fullt aftur, enda fer maður ekkert að gefast upp. Ekki úr þessu,“ segir hann og þakkar fata- og brettaversluninni Brimi og vinum og vandamönnum veittan stuðning.

Í myndbandinu hér fyrir ofan má sjá Hlyn um það leyti sem hann setti fyrra metið.

roald@frettabladid.is