Gera fleiri myndir um Þór

Fyrirtækið Caoz vill gera nokkrar teiknaðar framhaldsmyndir um Þór þrumuguð og persónur norrænu goðafræðinnar. Fyrsta myndin verður frumsýnd 14. október.

Framleiðandinn Arnar Þórisson hjá fyrirtækinu Caoz vonast til að þrjár til fjórar teiknimyndir byggðar á þrumuguðinum Þór og persónum norrænu goðafræðinnar verði framleiddar hjá fyrirtækinu. Þetta kemur fram í viðtali sem hið virta kvikmyndatímarit Hollywood Reporter tók við hann.

Undirbúningurinn fyrir næstu mynd um Þór er þegar hafinn og á hún að gerast á eftir Legends of Valhalla: Thor, sem verður frumsýnd hér á landi í þrívídd 14. október. „Við sjáum til hvernig þessari mynd vegnar áður en við ráðumst af fullum krafti í gerð næstu myndar," sagði Arnar í viðtalinu.

Fram kemur Caoz sé búið að selja myndina til 55 landa, þar á meðal hinna Norðurlandaríkjanna, Þýskalands, Ítalíu og Rússlands. Myndin hefur ekki enn verið seld til Bandaríkjanna eða Bretlands og segir Arnar ekki nauðsynlegt að koma henni á hinn erfiða bandaríska markað til að myndin gangi upp fjárhagslega. Kostnaður hljóðar upp á rúma 1,3 milljarða íslenskra króna, sem er tífalt meira en meðalmynd á Íslandi kostar, að sögn Arnars.

Í viðtalinu segir hann að bankahrunið á Íslandi hafi næstum því stöðvað framleiðsluna, sem stóð yfir í sjö ár, jafn langan tíma og tók Pixar að búa til fyrstu Toy Story-myndina. Arnar lítur jafnframt á það sem kost að leikna Hollywood-myndin um Þór hafi komið út í sumar. Hún hafi opnað augu margra fyrir þrumuguðinum og norrænni goðafræði, þrátt fyrir að hann hafi haft einhverjar áhyggjur af gerð myndarinnar til að byrja með.

Við þetta er því að bæta að Caoz hefur skrifað undir samning við norræna útgáfu- og efnisveiturisann Egmont. Samningurinn felur í sér að Egmont verður fulltrúi myndarinnar og vörumerkisins á Norðurlöndunum og á völdum mörkuðum í Norður-Evrópu og mun bera ábyrgð á sölu allra hliðarvara sem bera vörumerkið Legends of Valhalla, eða Hetjur Valhallar eins og það heitir á íslensku.

freyr@frettabladid.is