Í selskap með nöktum konum

Sænska þjóðin veit ekki í hvorn fótinn hún á að stíga gagnvart konungi sínum, Karli Gústaf, og meintum brotum hans. Kröfur um afsögn eru orðnar háværar og spá margir því að konungurinn falli á svipuðum tíma og laufin af trjánum enda vill þjóðin ekki hafa konung sem stundar strippklúbba.

Nei, nei, nei og aftur nei voru svör Karls Gústafs Svíakonungs við spurningum TT-fréttastofunnar í sérstöku einkaviðtali á mánudaginn var. Þar neitaði hann að hafa heimsótt frægan strippstað í Bandaríkjunum, ráðið til sín konur í veislur, að hafa verið fastagestur á súludansstað í Slóvakíu og síðast en ekki síst að til væru myndir af honum í selskap með nöktum konum. Ofangreint eru sögusagnir sem hafa gengið um heimspressuna undanfarnar vikur.

Það eru myndirnar sem vekja einna helst athygli en sá sem heldur því fram að hann hafi þær undir höndunum er hinn serbneski Mille Markovic. Sá hefur komið víða við á lífsleiðinni sem boxari, næturklúbbaeigandi, súludansstaðarekandi og leigumorðingi fyrir mafíuna.

Myndirnar umtöluðu eiga að vera af Karli Gústaf og fylgdarliði hans á strippstaðnum Club Power í Stokkhólmi. Þar sést konungurinn skemmta sér vel innan um naktar konur en myndirnar eru stillur úr myndbandi sem Markovic á að hafa tekið. Sérfræðingar, meðal annars á vegum sænska blaðsins Aftonbladet, hafa fengið að skoða stillurnar og segja þær vera ekta. Það sem þykir einna helst renna stoðum undir að Markovic segi satt er að besti vinur konungsins, Anders Lettström, reyndi að kaupa af honum myndirnar fyrir háa upphæð.

„Mér finnst það skrýtið að konungurinn haldi áfram að ljúga og viðurkenni ekki brot sín,“ segir Markovic í samtali við Aftonbladet, en hann hótar að setja myndirnar á netið á næstu dögum.

Sænska þjóðin er klofin í afstöðu sinni. Annars vegar eru þeir sem eru komnir með nóg af kvensemi konungs og krefjast þess að hann stígi til hliðar og leyfi dóttur sinni Viktoríu að taka við keflinu. Hins vegar eru þeir sem finnst ekki mikið til þess koma hjá fjölmiðlum að velta sér upp úr einkalífi konungsins. Fyrri hópurinn er háværari.

Silvía drottning bar ekki giftingarhringinn síðast þegar til hennar sást á opinberum vettvangi og hefur Magðalena prinsessa frestað ferð sinni heim yfir þjóðhátíðardag Svíþjóðar 6. júni, en hún er búsett í Bandaríkjunum. Enn sem komið er hefur ekki borið á viðbrögðum frá prinsinum Karli Filippusi og krónprinsessunni Viktoríu, en hún gæti þurft að taka við krúnunni af föður sínum fyrr en hún reiknaði með.alfrun@frettabladid.is