Skuldug Lady Gaga

Poppsöngkonan Lady Gaga kom heim með 350 milljóna króna reikning eftir tónleikaferð sína á síðasta ári. Söngkonan segist ekki hafa gert sér grein fyrir peningaeyðslunni og viðurkennir að leggja ekki mikið upp úr peningum.

„Peningar skipta mig engu máli en ég hélt ég væri á hausnum þegar ég kom heim. Einu stóru hlutirnir sem ég hef keypt á lífsleiðinni eru hjartalokuígræðsla fyrir pabba minn og Rolls Royce bíll fyrir foreldra mína,“ segir Lady Gaga og bætir við að hún hafi þurft að hringja nokkur símtöl og öskra á fólk fyrir að fylgjast ekki með eyðslunni meðan á ferðalaginu stóð. Lady Gaga þurfti samt ekki að hafa áhyggjur af reikningnum í langan tíma því hún græddi fimmtán milljarða króna á tónleikaferðinni og gat því borgað skuldirnar og vel það.