Á bókaða fjóra fundi í Hollywood

„Ég átti von á þeim fyrr en það kom eitthvað upp á hjá þeim úti. En jú, ég reikna með því að hitta þá þegar þeir koma,“ segir Gestur Valur Svansson leikstjóri. Eins og Fréttablaðið greindi frá í gær er Klovn-tvíeykið væntanlegt til Íslands í dag til að kynna kvikmynd sína Klovn: The Movie. Gesti Val og Casper Christensen varð ágætlega til vina síðasta sumar þegar þeir fóru saman á fund Adams Sandler í Los Angeles til að kynna nokkrar hugmyndir að kvikmyndum sem Gestur hafði sett niður á blað.

Gestur Valur er reyndar búinn að sjá Klovn-myndina, fór út til Danmerkur á forsýningu hennar 14. desember síðastliðinn og var síðan með Klovn-dúettinum í eftirpartíi. Forsýningin var ansi skrautleg því samkvæmt dönskum fjölmiðlum sprönguðu fáklæddar stúlkur um ganga kvikmyndahússins og hláturtaugarnar voru rækilega kitlaðar þegar þeir Frank og Casper stigu á svið og sögðu frá uppákomum við tökur kvikmyndarinnar.

Leikstjórinn, sem frumsýnir leikna þáttaröð á RÚV þegar Eurovision hefur runnið sitt skeið, er síðan á leiðinni til Los Angeles síðar í þessum mánuði þar sem hann mun sitja fjóra fundi með einhverjum stórlöxum úr kvikmyndaborginni. Hann vildi ómögulega upplýsa hverjir ættu eftir að sitja þennan fund en sagðist ætla að nýta tækifærið og heimsækja tökustað Baltasars Kormáks í New York sem þá verður byrjaður á Contraband með Mark Wahlberg og Kate Beckinsale í aðalhlutverkum.- fgg