Atli Rafn talar fyrir Þór og Laddi Mjölni

Atli Rafn Sigurðarson og Þórhallur Sigurðsson, Laddi, hafa verið ráðnir í tvö stærstu hlutverkin í teiknimyndinni Þór sem framleiðslufyrirtækið Caoz er að gera. Atli Rafn mun tala fyrir Þór og Þórhallur verður Mjölnir.

„Við prófuðum ansi marga fyrir hlutverkin en að endingu stóðu þessir tveir upp úr," segir annar leikstjóri myndarinnar, Óskar Jónasson. Laddi hefur auðvitað farið á kostum í mörgum teiknimyndum og margir muna eftir eftirminnilegri frammistöðu hans sem lampinn í Aladdin.

Teiknimyndin Þór verður dýrasta teiknimyndin sem Íslendingar hafa ráðist í enda er unnið á þremur stöðvum í Evrópu, aðalbækistöðvarnar eru á Íslandi en svo vinnur tæknilið baki brotnu á Írlandi og í Þýskalandi. Óskar segir það óneitanlega svolítið sérstakt og skrýtið fyrir sig, leikstjóra af gamla skólanum, að vinna við teiknimyndagerð þar sem sjö teiknaðar sekúndur í myndinni þykja gott vikuverk.

„Ég er sem betur fer þolinmóður gæi að upplagi. Nei, nei, maður verður bara að passa sig að missa ekki tengslin og það er kannski ágætt að maður sé kominn í svona „live-motion" verkefni samfara þessu," segir Óskar en eins og Fréttablaðið greindi frá á laugardaginn leikstýrir hann sjónvarpsþáttaröðinni Pressu. -fgg

Hér fyrir ofan má sjá nýlegt sýnishorn úr myndinni.