Hefði alveg viljað enda ofar

Þórunn Erna Clausen ekkja Sigurjóns Brink sem samdi Eurovision lagið Coming Home segist alveg hafa viljað enda ofar. Hún segir að hópurinn sé engu að síður sáttur með árangurinn. Lagið var í fjórða sæti í undankeppninni og 20. sæti í aðalkeppninni. Þórunn Erna segir tímann framundan líklega verða nokkuð skrýtinn.

Segja má að Vinir Sjonna hafi skilað framlagi vinar síns óaðfinnanlega á sviðinu í Dusseldorf á úrslitakvöldi keppninnar í gær. Lagið hafnaði í tuttuguasta sæti en það var Aserbadjand sem sigraði keppnina.

Þórunn Erna segir sín uppáhalds lög hafa verið framlag Danmerkur og Ítalíu en bæði þau lög enduðu ofarlega í keppninni. Hún viðurkennir að hópurinn hafi viljað enda ofar en sætti sig við tuttuguasta sætið.

„Við vorum svo glöð að heyra að við hefðum lent í fjórða sæti í undankeppninni. Við negldum hana svolítið vel," segir Þórunn Erna. Hún segir að ómögulegt hafi verið að segja fyrir um hvernig keppnin myndi fara.

Líkt og alþjóð veit lést Sigurjón rétt fyrir undankeppnina hér á landi en síðan þá hefur Þórunn einbeitt sér að því að gera atriðið sem flottast í keppninni. En hvað tekur nú við hjá henni?

„Þetta verður örugglega svolítið skrýtið. Þetta er búið að eiga allan hug minn og hjarta síðustu þrjá mánuði - fyrir utan börnin mín," sagði Þórunn Erna. Hún mun þó ekki sitja aðgerðarlaus á næstunni því að hún verður aðstoðarleikstjóri í leikritinu Galdrakarlinn í Oz. Það verkefni byrjar á morgun.