Ekki ein feilnóta hjá íslensku strákunum

„Þetta er ótrúlega tvísýn keppni. Svona vil ég hafa Eurovision,“ segir Páll Óskar Hjálmtýrsson, söngvari og einn helsti Eurovision sérfræðingur okkar Íslendinga. „Þetta á að vera spennandi og gjörsamlega óútreiknanlegt og tvísýnt,“ bætir Páll Óskar við. Páll Óskar segist samt hafa tekið eftir því að ótrúlega margir keppendur hafi verið stressaðir og falskir í kvöld. „Sum lögin voru svo illa flutt að maður hreinlega hélt fyrir eyrun stundum,“ segir Páll Óskar. Þetta hafi til dæmis átt við um franska söngvarann.

Páll Óskar segir að þetta hafi hins vegar alls ekki átt við um íslensku strákana. „Þetta var óaðfinnanlegt hjá þeim, ekki ein feilnóta. Öll músíkin í þeim, fagmennskan, húmorinn og kærleikurinn algjörlega skein í gegnum sjónvarpið,“ segir Páll Óskar.  

Páll Óskar segist veðja á að Íslendingar lendi í ellefta sæti. „En þetta lag hefur alla burði til þess að verða ofar og blanda sér jafnvel inn í topp tíu baráttunna,“ segir Páll Óskar.  

Páll Óskar hefur ákveðnar hugmyndir um það hvernig úrslitin verða í kvöld. „Ég er ansi smeykur um að Bretland sé að fara að hirða þetta bara út af fornri frægð strákabandsins,“ segir Páll Óskar. Hann hafi hins vegar kosið Írland, Þýskaland, Azerbaijan, Litháen og Danmörku. „Þetta er það sem ég fílaði í botn. Bæði geggjuð lög og vel flutt,“ segir Páll Óskar. Hann bætir því við að þýski keppandinn hafi verið kynþokkafyllsti keppandinn í ár.

Það var fámennt og góðmennt teiti heima hjá Páli Óskari að fylgjast með keppninni í þetta skiptið. „Svo er ég að fara í risapartý á NASA. Ég þeyti skífum þar frá miðnætti til klukkan fimm í nótt,“ segir Páll Óskar, en þetta er í níunda skiptið sem Palli er með partý á Nasa.