ÍBV fær miðjumann með reynslu úr Meistaradeildinni

Kvennalið ÍBV í knattspyrnu hefur fengið til liðs við sig miðjumanninn Melissu Cary. Á heimasíðu ÍBV vonast Eyjamenn eftir því að Cary hjálpi ÍBV í þeim miklu hremmningum sem liðið hefur orðið fyrir undanfarið.

Félagið hefur misst miðjumanninn Eddu Maríu Birgisdóttur til Stjörnunnar og þá glíma leikmenn liðsins við meiðsli.

Melissa á ættir að rekja til Bandaríkjanna og Ítalíu. Hún hefur meðal annars reynslu úr Meistaradeildinni en hún lék árið 2009 með liði Bardonlina á Ítalíu sem komst í undanúrslit keppninnar.

Melissa er fædd árið 1984 og hefur fengið leikheimild með Eyjakonum.