Brúarsmíði gengur vel

Vel hefur gengið við brúarsmíðina við Múlakvísl í nótt eftir því sem Vegagerðin greinir frá í fréttatilkynningu sinni, en áætlað er að hægt verði að hleypa umferð á brúna uppúr miðri næstu viku. Þó er tekið fram að hafa verði fyrirvara á því tímamarki, meðal annars með tilliti til vatnsmagns í ánni.

Tólf staurar voru reknir niður í nótt og eru 40 metrar af brúargólfi tilbúnir. Reiknað er með að í kvöld verði sjáanlegur um 50 metrar af brú, en í heild verður brúin 150-160 metrar. Brúargólfið mun vera um fjóra metra yfir vatnsborðinu.

Einnig er unnið að bráðabirgðabrú samhliða þeirri stærri en nú er unnið að því að koma grjóti á staðinn þar sem verja þarf veg og brú að austanverðu með grjótvörðum varnargarði.