Bjartmar tilnefndur í fyrsta sinn

„Þetta er virkilega flott og maður er bara þakklátur fyrst og fremst. Það er alltaf gott að fá hlýjan hug," segir tónlistarmaðurinn Bjartmar Guðlaugsson, sem hefur verið tilnefndur til þrennra Íslenskra tónlistarverðlauna.

Bjartmar gaf út plötuna Skrýtin veröld fyrir síðustu jól sem hefur fengið mjög góðar viðtökur. Hann er tilnefndur sem texta- og tónhöfundur ársins og fyrir lag ársins, Konan á allt. Þetta eru fyrstu tilnefningar Bjartmars á löngum ferli og þær komu honum í opna skjöldu. „Ég hafði alls ekki leitt hugann að þessu. Ég frétti þetta þegar ég var að koma af vel heppnuðum tónleikum á Hvanneyri."

Verðlaunaafhendingin verður haldin í Þjóðleikhúsinu 8. mars og þar verður Bjartmar á meðal gesta ásamt hljómsveit sinni Bergrisunum. „Að sjálfsögðu mæti ég með strákana. Þetta er þeirra líka, af því að við erum svo frjóir er við vinnum saman," segir hann og bætir við að hljómsveitin sé á leiðinni í hljóðver á næstunni. Ný plata kemur síðar á árinu með tilheyrandi tónleikahaldi í sumar.

Bjartmar hefur gefið reglulega út plöturum árin þrátt fyrir að mismikið hafi farið fyrir þeim. Hann naut mikilla vinsælda á níunda áratugnum og núna nýtur hann athyglinnar á nýjan leik „Ég vil bara vera samkvæmur sjálfum mér. Það er númer eitt, tvö og þrjú," segir hann og þakkar félögum sínum í Bergrisunum fyrir sitt framlag, eða þeim Birki Rafni Gíslasyni, Agli Erni Rafnssyni, Júlíusi Frey Guðmundssyni og Halldóri Waren.- fb

Hér fyrir ofan má hlusta á lagið Negril af YouTube-síðu Geimsteins.