Yrsa skellir Arnaldi aftur

Yrsa Sigurðardóttir trónir á toppi metsölulista bókaútgefenda aðra vikuna í röð með bók sína, Brakið. Þetta er í þriðja sinn í þessu jólabókaflóði sem Yrsa kemst í toppinn.

„Við erum bara kampakát,“ segir Pétur Már Ólafsson, útgefandi Yrsu, en skálað var í kampavíni í höfuðstöðvum Bjarts/Veraldar í gær þegar tíðindin bárust.

Arnaldur getur þó vel við unað, Einvígið er enn mest selda bók ársins. Fast á hæla hans kemur hins vegar Gamlinginn eftir Jonas Jonasson, hún er önnur mest selda bók ársins samkvæmt heildarlistanum og situr í þriðja sæti á metsölulistanum. - fgg