Ráðherrar víki sæti á Alþingi

Þingmenn þriggja stjórnmálaflokka hafa lagt fram frumvarp um heimild ráðherra til að víkja tímabundið af þingi á meðan þeir gegna ráðherraembætti. Fyrstu umræðu þingsins um frumvarpið er lokið og verður það til umræðu í allsherjarnefnd í dag.

„Með þessu er verið að styrkja stefnumótunar- og eftirlitshlutverk þingsins gagnvart framkvæmdarvaldinu. Það er fyrirliggjandi breyting á þingsköpum sem felur í sér mikla einföldun á nefndarstarfi hvers þingmanns þannig að hver þingmaður verði bara í einni nefnd en með þessu er bara verið að undirbyggja það enn frekar,“ segir Róbert Marshall, formaður allsherjarnefndar Alþingis, sem jafnframt er einn flutningsmanna frumvarpsins. Róbert bendir á að hætti viðkomandi ráðherra, þá tekur hann aftur sæti á þingi.

Valgerður Bjarnadóttir, þingmaður Samfylkingarinnar, er fyrsti flutningsmaður frumvarpsins, en aðrir flutningsmenn eru úr öllum flokkum nema Sjálfstæðisflokki.