Sprengiefnið lá í jörðinni í fimm ár

„Það hefði þurft að slá góðan dræver til þess að enda þarna,“ segir Steinn Ólafsson, vallastjóri Hlíðavallar, sem er golfvöllur Kjalar í Mosfellsbæ, en það var hann ásamt gröfumanni sem fundu talsvert magn af dýnamíti í gamalli námu ÍAV nærri golfvellinum.

Steinn ásamt gröfumanni vinna nú að stækkun golfvallarins og fundu þá fyrir tilviljun sprengihleðslu. Steinn lét Landhelgisgæsluna vita umsvifalaust sem koma á vettvang og fann þá fjórar sprengihleðslur. Ranghermt var í fyrri frétt um málið að kylfingur hefði látið vita af tilvist sprengiefnisins og leiðréttist það hér með.

„Það var nú enginn í hættu þarna enda er næsta braut í 200 metra fjarlægð,“ segir Steinn sem vinnur hörðum höndum að því að fjölga holum vallarins úr fjórtán upp í átján.

Framkvæmdum verður lokið í júlí og er stefnt á að spila meistaramót þar í sama mánuði. Spurður um uppruna sprengiefnisins svarar Steinn því til að þau hafi líklega legið þarna í fjögur til fimm ár.

Landhelgisgæslan fjarlægði hleðslurnar en þurfti að sprengja eina á staðnum. Hinum var fargað fyrir utan borgarmörkin.