Rocky Horror endurfundir

Hópurinn sem setti upp söngleikinn Rocky Horror í Menntaskólanum við Hamrahlíð hittist í Iðnó á föstudaginn í tilefni þess að tuttugu ár voru liðin frá frumsýningunni.

Söngleikurinn Rocky Horror var settur upp við miklar vinsældir í MH fyrir tuttugu árum og af því tilefni hittist leikhópurinn í Iðnó á föstudaginn, þegar nákvæmlega tuttugu ár voru liðin frá frumsýningunni. Söngvarinn Páll Óskar Hjálmtýsson, sem lék Frank-N-Furter, var á meðal þeirra sem mættu í partíið. Auk þess mættu þangað nokkrir úr Rocky Horror sýningunni sem hefur verið sýnd á Akureyri við góðar undirtektir.

Á meðal þeirra var Magnús Jónsson, sem leikur Frank-N-Furter, og María Sigurðardóttir, leikhússtjóri Leikfélags Akureyrar. „Þau leyfðu okkur að koma í heimsókn og þetta var hið skemmtilegasta partí," segir María og bætir við að bæði Magnús og Páll Óskar hafi sungið lög úr Rocky Horror. Hópnum úr MH hefur verið boðið á sýningu Rocky Horror fyrir norðan 25. febrúar. Um verður að ræða sýningu þar sem áhorfendur geta tekið virkan þátt í því sem fram fer.

Rocky Horror var sýnt 23 sinnum á Akureyri fyrir áramót og í febrúar er fjöldi sýninga fyrirhugaður.

freyr@frettabladid.is