New Order fór í andaglas

Liðsmenn poppsveitarinnar New Order fóru í andaglas til að ná tali af fyrrum forsprakka sveitarinnar, Ian Curtis. Vonuðust þeir til að Curtis myndi vísa þeim á græjur sem óprúttnir aðilar stálu af þeim í New York þegar sveitin var á tónleikaferð um Bandaríkin. Þjófarnir höfðu á brott með sér rútu og töluvert magn af verðmætum græjum.

Trommuleikarinn Stephen Morris upplýsti þetta í viðtali við tímaritið Mojo. „Við héldum í alvörunni að Curtis myndi sýna okkur hvar græjurnar væru. En hann gerði það ekki. Við urðum leiðir á þessu og að endingu sat ég bara einn. Og þá kom einhver sem talaði ekki ensku og það hræddi nánast líftóruna úr mér. Miklu meira en að glasið skyldi hreyfast uppá sitt eigið einsdæmi."

New Order hét áður Joy Division og var þá með söngvarann Ian Curtis innanborðs. Hann féll fyrir eigin hendi árið 1980 og ákvað sveitin þá að taka upp nafnið New Order.