Flýgur til Íslands fyrir Quarashi

Bandaríkjamaðurinn David Demkö ætla að fljúga alla leið til Íslands til að sjá eina af sínum uppáhaldshljómsveitum, Quarashi, spila á Bestu útihátíðinni í júlí. „Ég hef verið aðdáandi síðan 2002 eða 2003. Ég heyrði fyrst í þeim þegar ég var að spila tölvuleikinn Madden NFL 2003 en þeir áttu lag í honum," segir Demkö og á þar við Mr. Jinx. „Þeir voru ein af fyrstu fjórum hljómsveitunum sem ég keypti mér plötu með. Hinar voru Rage Against The Machine, Green Day og Linkin Park. Þetta var á þeim tíma þegar ég var uppgötva tónlist."

 

Demkö, sem er nítján ára, á allar plöturnar með Quarashi en náði aldrei að sjá íslensku rapparana á tónleikum áður en þeir hættu störfum. Þess í stað hefur hann látið sér myndbönd af netinu nægja til að svala Quarashi-þorsta sínum. Fregnirnar af endurkomu sveitarinnar voru því afar gleðilegar og ákvað hann panta sér ferð fyrir einn til Íslands vegna tónleikanna.

 

Demkö stundar nám í upptökustjórn í Orlando á Flórída en er einnig plötusnúður í hjáverkum.Spurður hvort hann spili ekki Quarashi á dansgólfinu segist hann reyna hvað hann geti til að koma þeim að. „En það eru ekkert voðalega margir sem þekkja þá þannig það er frekar erfitt. En ég reyni að deila tónlist þeirra með fólki sem þekkir þá," segir hann og nefnir Björk og Bang Gang sem aðra íslenska flytjendur sem hann kannast við. - fb