Penélope og Javier eignast sitt fyrsta barn

Spænsku leikarahjónin Penélope Cruz og Javier Bardem eignuðust sitt fyrsta barn nú í vikunni.

Samkvæmt spænska blaðinu El País fæddist barnið á Cedars-Sinai spítalanum í Los Angeles. Blaðið hefur það eftir heimildarmönnum að þetta sé sveinbarn. Meira fékkst ekki uppgefið enda eru hjónin bæði afar fámál um einkalíf sitt.

Penélope og Javier giftu sig á Bahama-eyjum í fyrrasumar. Þau hittust fyrst og léku saman árið 1992 en byrjuðu í sambandi í kjölfar þess að leika saman í Woody Allen-myndinni Vicky, Christina, Barcelona árið 2007.

Það er af nógu að taka hjá Bardem í þessarri viku en í gær var einnig tilkynnt að hann væri tilnefndur til Óskarsverðlauna fyrir bestan leik í aðalhlutverki í myndinni Biutiful. Þar talar hann spænsku en hann er fyrsti leikarinn í sögunni sem er tilnefndur til verðlaunanna fyrir hlutverk sem er leikið á öðru tungumáli en ensku.

Penélope Cruz sést næst í fjórðu Pirates of the Caribbean-myndinni en það var einmitt á tökustað hennar nú í haust sem óléttan uppgötvaðist fyrst.