Sonurinn lamaður fyrir neðan mitti - „Hrikalegt áfall“

Íslenskur karlmaður liggur alvarlega slasaður á sjúkrahúsi í Innsbruck í Austurríki eftir að hafa lent í slysi á gamlárskvöld. Maðurinn heitir Pétur Kristján Guðmundsson og er 24 ára gamall. Hann var á göngu í fjallshlíð með félaga sínum eftir að hafa fylgst með flugeldasýningu þegar hann féll fram af hengju. Pétur Kristján hlaut við fallið mænuskaða og er lamaður fyrir neðan mitti.

Faðir mannsins, Guðmundur Geir Sigurðsson, segir erfitt að lýsa því hvernig tilfinning það er fyrir föður að fá þær fregnir að barnið hans hafi lent í alvarlegu slysi.

„Fyrst gerir maður sér ekki grein fyrir alvarleika málsins. Maður lifir í þeirri trú að þetta verði allt í lagi þar til fréttirnar segja manni annað. Þetta er náttúrulega bara hrikalegt áfall. Líka fyrir hans hönd. Hann er bara 24 ára gamall," segir Guðmundur Geir.

Pétur Kristján er hálf þýskur en var á ferðalagi um Austurríki með unnustu sinni þegar slysið varð. Unnustan, móður Péturs og vinir hans eru hjá honum í Innsbruck en Guðmundur Geir stefnir á að fara utan á föstudag til að styðja son sinn.

Pétur Kristján gekkst undir aðgerð á sjúkrahúsinu strax eftir slysið en var síðan haldið sofandi í tvo sólarhringa. Hann er nú kominn til meðvitundar.

Hann er mikill snjóbrettakappi en slysið var þó allsendis ótengt snjóbrettaiðkun. „Það kaldhæðnislega við þetta er að þetta gerðist bara í ósköp venjulegum göngutúr," segir Guðmundur Geir.

Hann er þegar byrjaður að undirbúa flutning sonar síns til Íslands. Hann er enn að reyna að átta sig á afleiðingum slyssins. „Niðurstaða læknanna er að hann fari ekki á fætur aftur," segir hann.

Stuðningssíða fyrir Pétur Kristján hefur verið stofnuð á Facebook. Hana er að finna hér.