Platan sem hefur vantað

Rokksveitin Reykjavík! hefur gefið út sína þriðju plötu, Locust Sounds. Tjöruhúsið á Ísafirði tók þátt í fjármögninni.

Þriðja plata rokksveitarinnar Reykjavík!, Locust Sounds, er nýkomin út. Þrjú ár eru liðin frá síðustu útgáfu og eru þeir félagar hæstánægðir með þessa nýjustu afurð sína.

„Við höfum alltaf verið í hljómsveit til að hafa gaman og gera það sem okkur finnst skemmtilegt,“ segir gítarleikarinn Haukur S. Magnússon. „Þegar við gerum plötur gerum við plötur sem við myndum sjálfir vilja kaupa. Ride [frá Bretlandi] er fáránlega góð hljómsveit með djúpan hljóðheim og raddanir. Við hugsuðum með okkur að það væri gaman að gera eitthvað svoleiðis. Svo þegar platan okkar var tilbúin hugsuðum við: „Djöfull hljómar þetta vel“,“ segir hann. „Við erum ekki endilega að dást að okkur heldur finnst okkur að loksins sé einhver búinn að gera þessa plötu sem okkur finnst hafa vantað síðan við vorum unglingar. Það vildi þannig til að það vorum við sem gerðum hana.“

Mr. Silla, krakkarnir úr FM Belfast, Erna Ómarsdóttir og Mugison voru á meðal þeirra sem sungu bakraddir á plötunni. Strákarnir borguðu hljóðverstímana úr eigin vasa, um 100 þúsund kall hver. Þeir gefa út sjálfir í samstarfi við Kimi Records. Einnig var platan fjármögnuð að hálfu af Tjöruhúsinu á Ísafirði, sem foreldrar Hauks reka. Við lokafrágang plötunnar ákváðu Haukur og félagar að leita ráða hjá tónlistarsérfræðingum um hvernig lagaröðin ætti að vera. „Við ákváðum að það væri gott að fá önnur eyru því glöggt er gests augað.“

Fyrsta lagið af Locust Sounds, Hellbound Heart, er komið í útvarpsspilun. Á næsta ári fer sveitin til Japans og Ástralíu og flytur þar dansverk ásamt Lazyblood, sem er skipuð listaparinu Ernu Ómarsdóttur danshöfundi og Valdimar Jóhannssyni úr Reykjavík!.

freyr@frettabladid.is