Heldur rólegra síðasta hálftímann

„Þetta er heldur rólegra núna svona síðasta hálftímann," segir Sigþrúður Ármannsdóttir, landfræðingur hjá Veðurstofu Íslands.

Hún segir að jarðskjálftahrina hafi byrjað á fimmtudagskvöld en síðan þá hafa mörg hundruð skjálftar mælst. Það var svo á miðnætti í gær sem skjálftarnir fóru að aukast og laust fyrir klukkan hálf sex í morgun sem „eitthvað fór að gerast, svo hefur þetta bara haldið áfram," segir hún.

Jarðskjálfti upp á 3,2 á richter varð við Kleifarvatn klukkan 05:46 í morgun og annar álíka skjálfti varð klukkan 05:20. Klukkan 09:06 mældist svo skjálfti upp á 4 á richter á sama svæði, en skjálftarnir eru um fjóra kílómetra norðaustur af Krýsuvík. Rétt fyrir klukkan tíu mældist svo skjálfti upp á 3,3 á richter.

Íbúar höfuðborgarsvæðisins hafa fundið fyrir skjálftunum í morgun. „Þeir hafa fundist vítt og breytt um höfuðborgarsvæðið. Það er nokkuð algengt að hrinur séu þarna á svæðinu," segir Sigþrúður.

Yfir 200 skjálftar hafa mælst frá miðnætti. Fylgst er með stöðu mála á Veðurstofu Íslands.