Járnhnefar og ástarleit

Að venju er af nægu að taka í kvikmyndahúsum borgarinnar um helgina. Killer Elite, kvikmynd úr smiðju Sigurjóns Sighvatssonar, verður frumsýnd eins og kemur fram hér annars staðar og svo er vert að minnast á þær þrjár íslensku kvikmyndir sem nú eru sýndar: Sóleyjar, hrafnar og myrra, Eldfjall Rúnars Rúnarssonar og svo þriðja Sveppa-myndin.

Kvikmyndin Real Steel hefur verið auglýst sem ein „óvæntasta" mynd ársins hér á landi. Sennilega eiga kvikmyndamógúlarnir við að myndin sé einn óvæntasti smellur ársins. Myndin fær enda 7,1 á imdb.com og 62 prósent gagnrýnenda eru jákvæð í hennar garð samkvæmt rottentomatoes.com. Myndin segir frá Charlie Kenton, uppgjafa hnefaleikakappa, sem verður að horfa á eftir stöðu sinni í hringnum þegar vélmennnabardagar verða vinsælir í náinni framtíð. Hann fær hins vegar eitt tækifæri til viðbótar þegar honum býðst að þjálfa slíkan hnefaleika-járnhaug. Aðalhlutverkin í myndinni eru í höndum Hughs Jackman og Evangeline Lilly.

What's Your Number er rómantísk gamanmynd með þeim Chris Evans og Önnu Faris. Hún segir frá leit Ally að besta fyrrverandi kærasta sínum enda er stúlkan orðin leið á því að eignast alltaf nýjan bólfélaga í hverri viku. Ally ákveður að fá aðstoð hjá nágranna sínum Colin en sá er óforbetranlegur kvennabósi.