Hittu sömu aðdáendur og 1984

„Þetta var frábært. Við hittum mikið af fólki sem hafði séð okkur "84 þegar við fórum síðast og það var rosalega hamingjusamt að sjá okkur aftur,“ segir Jóhann Ásmundsson, bassaleikari Mezzo­forte.

Hljómsveitin er nýkomin heim frá Japan þar sem hún spilaði á sex tónleikum í borgunum Tókýó og Osaka. Þetta voru fyrstu tónleikar Mezzoforte í Japan í 27 ár. Sveitin spilaði í klúbbi sem heitir Billboard Live fyrir framan 300-400 manns í hvert skipti og viðbrögðin voru mjög góð. Eftir hverja tónleika hitti Mezzoforte aðdáendur sína og gaf eiginhandar­áritanir. „Maður var hálfhissa yfir móttökunum sem við fengum. Þetta var mjög skemmtileg ferð og ánægjuleg að mörgu leyti en þetta var erfitt varðandi tímamismuninn,“ segir Jóhann en níu klukkustundum munar á Íslandi og Japan. Ferðalagið þangað var langt og strangt, um sólarhringur, og þurftu þeir félagar að millilenda í Kaupmannahöfn og Helsinki á leið sinni til Tókýó.

Markaðurinn í Japan er gríðar­lega stór og Jóhann vonast til að kveikja áhuga Japana á Mezzoforte enn frekar. „Með auknum áhuga gæti þetta verið mjög góð viðbót við allt annað sem við gerum,“ segir hann og útilokar ekki að koma þangað aftur eftir eitt til tvö ár. Engir tónleikar hafa verið bókaðir með Mezzoforte á næstunni. Þó stendur til að spila hér á landi seinna á árinu. Jóhann segir að stefnt sé að upptökum á nýrri plötu á þessu ári.

- fb