Hannar fyrir Hollywood

Ameríski söngvarinn Steven Tyler bar eyrnalokka hönnuðarins Rannveigar Gísladóttur í lokaþætti American Idol og á frumsýningu Pirates of the Caribbean: On Stranger Tides í vor. Stílistar Rihönnu og Keishu hafa einnig keypt lokka Rannveigar fyrir skjólstæðinga sína en hún hefur þó enn ekki séð þær koma fram með þá.

Rannveig er búsett í Hollywood og þar hannar hún undir merki sínu Ranna Design. Hún segist selja hönnun sína í lítilli tískuverslun í Los Angeles. „Þetta er mjög fín búð og þar verslar mikið af frægu fólki og stílistum. Búðin er falin og ekki merkt," segir Rannveig og bætir við að Steven Tyler og stílistar Rihönnu og Keishu hafi keypt eyrnalokkana þar.

Rannveig segist hafa fengið talsverð viðbrögð eftir að Tyler birtist opinberlega með eyrnalokk sinn. „Þegar ég var einu sinni með svipaðan eyrnalokk og Steven Tyler var með var ég spurð úti á götu hvort þetta væri eins lokkur og hann var með," segir Rannveig glaðlega og finnst gaman að frægt fólk noti hönnun hennar.

Rannveig er 25 ára og útskrifaðist sem fatahönnuður úr Fashion Institute of Design and Merchandising síðasta vor. Hún hlaut verðlaun fyrir glæsilegan árangur í náminu við útskrift. Frá útskrift hefur hún meðal annars verið að vinna hjá sænska hönnuðinum Lottu Stensson og einnig hefur hún hannað búninga fyrir tónlistarmyndbönd og stuttmyndir. „Ég var meðal annars að vinna með plötusnúðnum Flying Lotus sem er þekktur hérna úti."

Hvað er á döfinni hjá þér núna? „Ég ætla reyndar að koma heim núna í haust í eitt ár. Svo ætla ég að fara aftur út og halda áfram í skóla," segir Rannveig sem hefur til dæmis hug á að læra meira í búningahönnun. „Ég ætla líka að fara að byggja upp mína eigin línu þegar ég kem heim. Það verður kannski rólegra í öðrum verkefnum þá."

martaf@frettabladid.is