Gefur viðskiptavinum stöðumælaklink

„Þetta vekur ómælda athygli og það er alveg ótrúlegt hvað fólk er duglegt að setja pening í skálina,“ segir Tómas Kristjánsson, eigandi iSímans í Skipholtinu.

Tómas geymir skál fulla af klinki á afgreiðsluborðinu og geta viðskiptavinir tekið pening úr skálinni og notað til þess að greiða í þá stöðumæla sem er að finna á bílastæðinu fyrir utan. „Við erum með mjög einfalda gjaldskrá hjá okkur svo fólk er oft að fá tíkalla til baka. Helmingurinn af viðskiptavinum okkar lætur klinkið bara í skálina,“ segir Tómas.

Verslunin var áður staðsett að Stórhöfða, en þar var ekki neina stöðumæla að finna. „Mér finnst alveg ömurlegt að viðskiptavinir mínir þurfi núna að borga til þess að koma til mín. Að hafa þessa skál var einfaldlega bara það næstbesta í stöðunni,“ segir Tómas, og bætir við að borgin hafi neitað að leigja sér stæði fyrir utan. Hann segir jafnframt að stöðumælaverðirnir séu duglegir að sekta í Skipholtinu. „Ég bjóst ekki við því að þeir væru að sekta svona mikið, sérstaklega þar sem verslunin er alveg við endann á stöðumælunum.“

Tómas segir að hver sem er megi kippa klinki úr skálinni. „Þetta er auðvitað ætlað viðskiptavinum okkar en ég yrði ekkert brjálaður ef einhver kæmi hér inn, tæki tuttugu krónur úr skálinni og færi á Ruby Tuesday,“ segir Tómas í léttum dúr. -ka