Fjölskyldan með Sin Fang í nýju myndbandi

Sin Fang rennir sér um á hjólabretti með heklað skegg í sínu nýjasta tónlistar­myndbandi. Fjölskylda hans hefur veitt honum dygga aðstoð undanfarið.

Tónlistarmaðurinn Sin Fang, eða Sindri úr Seabear, rennir sér um á hjólabretti með heklað, hvítt skegg í nýju myndbandi við lagið Because of the Blood. Það er fyrsta smáskífulagið af annarri sólóplötu hans, Summer Echoes, sem kemur út hér heima og erlendis 15. mars á vegum Kimi Records og þýsku útgáfunnar Morr Music.

„Þetta er hugmynd sem ég og bróðir minn unnum saman. Hann gerði vídeóið og mamma og kærastan mín gerðu skeggið," segir Sindri, sem er líka með skeggið á umslagi plötunnar. „Þær hafa verið að búa til blúndukraga fyrir konur og okkur datt í hug að gera svona skegg. Ég var með litað skegg á fyrstu plötunni sem ég bjó til úr pappa. Þá var „koverið" litríkt en þetta er meira hvítt og einfaldara."

Af hverju safnarðu ekki bara eigin skeggi? „Það er alveg á mörkunum að ég geti það. Kannski geri ég þetta bara af því að ég er með svo lélega skegg­rót," segir Sindri léttur.

Bróðir hans, Máni, hefur áður gert myndbönd fyrir Seabear, Sóleyju Stefánsdóttur úr Seabear og Snorra Helgason. Sindra finnst gott að vinna með honum. „Við erum með mjög svipaða fagurfræði."

Sindri er gamall hjólabrettakappi en hefur lítið komið nálægt íþróttinni undanfarin ár, eða síðan hann fór í þriðja sinn úr olnbogalið eftir að hafa dottið á hausinn. „Ég hef alveg stigið á hjólabretti síðan en ekkert alvarlega. Ég horfi líka á hjólabrettamyndir og lag af fyrri plötunni minni var í hjólabrettamynd um daginn."

Næsta myndband hans verður lagið Two Boys og því leikstýrði kærastan hans sem heitir Ingibjörg Birgisdóttir. Hún hannaði líka umslag nýju plötunnar, auk þess sem pabbi Sindra tók ljósmyndarnar í umslaginu.

freyr@frettabladid.is